Press Release No. 54 / March 14, 2022

PRIORIDAD sa Provincial Government of Bukidnon (PGB), pinaagi sa Provincial Health Office (PHO), sa pagpanguna ni provincial health officer Dr. Gary Guido C. Tabios Jr. MD. ang kahimsog sa panghuna-huna sa katawhan niini, rason nga gilusad ang 1st LGU-Mental Health Coordinators Virtual Meeting nga gitambungan sa nagkalain-laing LGU sa lalawigan, niadtong, Marso 8, 2022 pinaagi sa zoom platform.

Base sa status report sa PHO niadtong January – June 2021, adunay natala nga unom (6) ka suicide incidence sa Bukidnon, kung aha duha (2) gikan sa lungsod sa Cabanglasan; tag-usa (1) ka kaso gikan sa Dangcagan, Manolo Fortich, Pangantucan ug Sumilao. Sa maong gidaghanon sa kaso, upat (4) niini ang nakabsan gayud sa kinabuhi.

Gipaningkamotan sa PHO nga hugot ma-monitor ang maong programa aron malikayan ang dakong damyos sa kinabuhi.

Ang maong aktibidad tumong nga mahatagan sa giya ang mga heathcare workers, ilabi na ning padayon nga pakigsangka sa pandemya nga hatud sa COVID-19, ingon man sa mga pamaagi nga angayang buhaton sa higayon nga mabatyagan ang stress sa trabaho, ilabi na kadtong nameligro nga dako ang kahigayunan nga makasinati sa mental stress ug uban pang matang sa depresyon.

Lauman usab ang mga mosunod nga kalihukan sa PHO karong umaabot Marso 19, 2022 alang sa International Day Against Bullying and Violence Seminar Online ug ang World Bipolar Day sa Marso 30, 2022.

###