Press Release No. 55 / March 15, 2022

NAGMALAMPUSON ang pagpahigayon sa Pamulakag 2022 (Opening Ritual) nga nag-abli sa Kaamulan 2022 nga gitambungan sa mga elders, datu ug mga bae sa pito ka tribu sa Bukidnon, ingon man sa mga Barangay ug City/Municipal Indigenous Peoples’ Mandatory Representatives (IPMRs) nga gipangunahan ni Provincial IPMR Datu Richard Dinlayan Macas kaganihang buntag-Marso 15, 2022 dinhi sa Capitol Compound, Malaybalay City, Bukidnon.

Kini ang naandan nga bulohaton nga kulturanhon sa dili pa pormal nga pagasugdan ang Kaamulan dinhi sa Bukidnon diin gipahigayon ang paghalad ngadto sa mga espiritu sa palibot sama sa espiritu sa kahoy, kabukiran, katubigan, kalayo ug sa tanang lumalabay sama sa espiritu sa hangin uban sa hugot nga panalangin ug pag-ampo nga matabangan ang tanang lumilihok sa Kaamulan nga mahawanan ang dalan sa pagahimoong nagkadaiyang kalihukan aron mahimong hapsay ug malinawon ang maong kasaulogan.

Uban sa presensya sa pito (7) ka tribu sa Bukidnon nga gilangkuban sa tribung Talaandig, Higa-onon, Bukidnon, Umayamnon, Matigsalug, Manobo ug Tigwahanon gisugdan ang pagpangamuyo nga mahatagan sa gasa ug giya ang panagtapok sa tanang tribu sa lalawigan, ingon man ang pagpangayo ug pasaylo kung aduna ma’y kalapasan nga nahimo ang tibuok probinsya, sumala sa pagpasabot ni Bae Adelina “Inatlawan” Tarino, ang spiritual chieftain (baylan) sa tribung Bukidnon.

Sa iyang pakigpolong, gipasabot ni Datu Richard Dinlayan Macas nga pipila lamang sa mga kalihukan ang nakaandam karon alang sa Kaamulan tungod kay anaa pa man ang hulga sa COVID-19, busa ang mga naandan nga activities kaniadto, sama sa Kaamulan Streetdancing and Grounds Competition dili kini ona masaksihan. Ang importante nga nagkatapok ang mga elders ug nagkasabot-sabot ug nagkahiusa alang sa mamahimong kalambuan sa tanang tribu sa lalawigan.

Sa ngalan sa pito ka tribu sa Bukidnon, kinasing-kasing nga gipasalamatan ni Datu Macas ang tanang datu ug bae nga nakighiusa sa kalihukan, ingon man ang iyang pagpasalamat ngadto kang Governor Jose Ma. R. Zubiri, Jr. sa gihimo niining sakripisyo, pagsuporta o pagpaluyo sa tanan nilang mga kalihukan, ilabi na nga nahatagan niini ug dalan ang subling pagsaulog sa Kaamulan, diin ulahi kining nasaulog niadtong tuig 2019.

Ang mga nakalinya nga kalihukan sa Kaamulan 2022 sugod karong Marso 23 hangtud Abril 23, 2022 gilangkuban sa Ethnic Rituals, Soil Painting, Tribal Instrument Making and Playing, Panalawig Ritual, Tribal Wedding, Culture and the Arts Exhibits (with Madagaya Trade Fair), Kaamulan Dart Tournament, Kaamulan Lawn Tennis Tournament, Ethno Cultural Festival, Tangkulo, Motorcycle Endurance Riding, ug Kaamulan Marathon (1st Leg).

###