Press Release No. 56 / March 16, 2022

“Garbo nako nga karong adlawa, e turn-over nako kining building. It’s great pleasure on my part to be here today inspite of the rain, basta Kibawe walay problema, I will always be here.”

Kini ang tipik sa mensahe ni Provincial Governor Jose Ma. R. Zubiri, Jr. human niini gitugyan ngadto sa lokal nga kagamhanan sa Kibawe, Bukidnon ang bag-ong Market Stalls Phase II, pinaagi sa Turnover, Ribbon Cutting and Acceptance Ceremony, niadtong Marso 14, 2022.

Matud ni Governor Zubiri nga sa kanunay, anaa siya ug andam motabang alang sa kalambuan sa lungsod.

Samtang isip tubag sa gipaabot nga mensahe ni Governor Zubiri, gipaabot usab ni Municipal Councilor Rizalito Panis, kinsa mao head committee on Infrastructure ang iyang dakong pagpasalamat ngadto sa Provincial Government of Bukidnon, pinaagi kang Governor Zubiri nga anaa kanunay nagsuporta sa mga proyekto sa matag lungsod ug nanghinaot nga mapadayon pa niya ang iyang maayong pagpanerbisyo ug mga legasiya.

Sa data gikan sa Provincial Project Monitoring and Inspectorate Team (PPMIT), mikabat ngadto sa kantidad 30-milyones ka pesos ang kinatibuk-ang pondo nga gibubo gikan sa panudlanan sa Pangagamhanang Probinsyal alang sa katukuran sa maong edipisyo nga gisugdan pagtrabaho niadtong Disyembre 25, 2020 ug natapos niadtong Oktobre 20, 2021.

Kauban ni Governor Zubiri nga mitambong sa maong seremonya, taliwala sa kusog nga bundak sa ulan, sila Kibawe Municipal Mayor Reynaldo S. Ang Rabanes, mga konseho sa lungsod sa Kibawe, pinangulohan ni Vice-Mayor Raymundo Batao, Jr., Provincial Engineer Albert D. Yulo ug Engr. Urbano U. Lampera, Jr., ang team leader sa PPMIT.

###