Press Release No. 57 / March 16, 2022

PADAYON karon nga naglibot ang mga personahi sa Provincial Health Office (PHO) sa mga kabaranggayan sa probinsya aron magpahigayon sa Mobile Voluntary Blood Donation, subay sa mandu sa Department of Health (DOH).

Sa impormasyon gikan sa PHO, sugod tuig 2013 pa kini nila nga kalihukan sa tinguha nga mapabilin ang igong supply sa dugo diha sa mga Provincial Stations alang sa mga nanginahanglan nga pasyente sa tibuok probinsya. Ingon man, matabangan ang walay kapasidad nga mopalit ug dugo ngadto sa mga pribadong blood banks.

Sa 1st quarter report sa bulan sa Enero 2022, adunay 479 nga donors ang nalikom sa Mobile Blood Donation sa PHO, samtang sa bulan sa Pebrero adunay initial report nga 823 donors gikan sa petsa 3 hangtud petsa 22 sa susamang tuig. Karong bulan sa Marso, sunod-sunod ang schedule sa Bloodletting Activity, diin bag-o pa kini napahigayon dinhi sa Centennial Stage, Malaybalay City ug niadtong Marso 9, 2022 gilusad kini didto sa Barangay Laligan, Valencia City, gisundan sa Barangay Busdi, Malaybalay City, Barangay Sinayawan, Valencia City, Barangay Gandingan, Pangantucan ug gilauman nga bulan sa Abril ipahigayon na usab ang sunod-sunod nga Bloodletting Activities.

Gibutyag ni Ms. Avril Melissa Bughaw, Health Education and Promotion Officer II sa PHO nga kadtong nag-donate ug dugo mas dali usab mahatagan ug pagtagad kung ugaling magkinahanglan sila ug dugo. E-presenta lang nila ang ilahang donation card diha sa mga Provincial Stations nga makita sa Bukidnon Provincial Medical Center (BPMC), Bukidnon Provincial Hospital (BPH)-Maramag, BPH-Kibawe ug BPH- Manolo Fortich.

Ang si kinsa mang interesadong mo-donate ug dugo mamahimong motawag kang Mr. Joseph Gealon, ang Bloodletting, HIV-AIDS ug Leprosy Coordinator sa probinsya ug pwede usab motawag sa numero: 0917-792-4220.

###