Press Release No. 58 / March 16, 2022

GIPAGAWAS sa Provincial Government of Bukidnon ang usa ka kamanduan nga temporaryong nagdili sa pagsulod sa mga domestic ug wild birds, poultry products ug mga by-products niini sa probinsya sa Bukidnon sulod sa 45 ka adlaw, gikan sa Marso 10, 2022 hangtud sa Abril 25, 2022 gawas kon bawion o lugwayan.

Kini pinasikad sa Executive Order No. 5, series of 2022 ni Provincial Governor Jose Ma. R. Zubiri, Jr. pinitsahan Marso 10, 2022 nonot sa kumpirmadong kaso sa Avian Influenza (AI) Type A Subtype H5N1 sa umahan sa itik sa Baliuag, Bulacan ug Candaba, Pampanga ingon man ang umahan sa pugo sa Candaba ug Mexico, Pampanga, diin gipadala usab kini ngadto sa World Organization for Animal Health nga mao ang kanhi Office International des Epizooties (OIE) niadtong Pebrero 18, 2022 ug gimantala ngadto sa World Animal Health Information System (WAHIS) niadtong Pebrero 21, 2022. Sa sunod-sunod nga pagpahigayon sa mga kalihokan sa pagpaniid sulod sa 1 ka kilometro nga quarantine area ug imbestigasyon sa sakit isip kabahin sa trace back/trace forward monitoring, dugang kaso sa H5N1 ang nakumpirma sa Minalin, Pampanga; Victoria, Laguna ug sa Sipocot, Camarines Sur.

Ang avian influenza usa ka zoonotic nga sakit ug usa usab ka hulga sa industriya sa manok sa probinsiya nga adunay 255 ka rehistradong commercial poultry farms ug backyard poultry raisers.

Agig kabahin sa hugot nga pagbantay batok sa H5N1 dinhi sa Bukidnon, gitahasan ni Governor Zubiri ang Provincial Veterinary Office nga gipangunahan ni acting provincial veterinarian Dr. Stephen M. Arcayera, pinaagi sa gimontar nga trese (13) ka mga Provincial Veterinary Sanitary Checkpoints nga susihon ang tanang mosulod nga salakyan sa lalawigan gikan sa laing rehiyon sa nasud aron ipakisayud ang temporaryong pagdili sa pagpasulod sa mga poultry products. Pipila sa mga eksepsiyon dinhi kung ang poultry lakip ang wild birds ug mga produkto niini, sama sa mga karne, itlog, semilya ug abono gikan sa Region X, gawas kon ang usa ka lugar sulod sa rehiyon gideklarar nga bird flu infected zone; Tugutan nga makasulod ang linuto ug de-lata nga poultry goods basta ang maong mga butang adunay tukma nga mga dokumento; samtang gitugtan usab ang transshipment sa imported nga day-old nga mga piso, day-old pullets, pagpusa sa mga itlog gikan sa international airports ug seaports sa Luzon paingon sa Bukidnon.

Ang mga magdala sa gidili nga mga langgam, manok ug mga produkto sa manok lauman nga balibaran gayud sa pagsulod sa probinsya ug ang bisan unsang masapon nga mga butang ipabalik kung aha man kini naggikan.

Subay sa Advisory nga gipagula sa Department of Agriculture Region X niadtong Marso 9, 2022, mamahimong motawag ang katawhan sa Bukidnon sa numero 0906-870-2382 kung aduna may mga pangutana kabahin niini nga kabalaka sa H5N1.

###