Press Release No. 60 / March 18, 2022

GIHINGUSGAN sa Provincial Government of Bukidnon (PGB), pinaagi sa Provincial Youth Development Division nga mahatagan sa pagtagad ang mga isyu ug problema nga giatubang sa mga Local Youth Development Officers (LYDO) sa ilang mga munisipyo ug syudad diha sa pag-abag sa mga programa, kalihukan ug proyekto sa mga Sangguniang Kabataan (SK), atol sa gipahigayon nga Bukidnon League of Local Youth Development Officers (BLLYDO) Quarterly Consultative Meeting, niadtong Marso 14-15, 2022 sa Barangay Lorega, Kitaotao, Bukidnon.

Lain-laing mga hilisgutan ang gipaambit sa mga dinapit nga mamumulong sila Ms. Lorjezza S. Siao, LGOO-IV, kinsa nagrepresenta kang DILG provincial director Engr. Carmelo Enrique B. Libot, CESO V, League of Mayors in the Philippines-Bukidnon President Mayor Renante V. Inocando, Provincial Accountant Richel R. Okit ug si Ms. Karenne B. Añover, ang Cluster Head sa Northeastern Mindanao sa National Youth Commissions (NYC), kinsa mibatbat sa mga mahinungdanong hisgutanan kalabot sa maayong pagdumala, katungdanan ug mga angayang ipatuman nga proyekto, programa ug kalihukan sa mga LYDO’s.

Sa maong okasyon, gipasabot ni Ms. Siao ang Mandanas Ruling ug ang mga gipagawas nga memorandum sa DILG kabahin sa pagmugna ug opisina sa LYDO ug pagtudlo sa mga LYD Officers sa matag munisipyo ug syudad, lakip na ang paggahin ug pondo niini. Samtang gipasabot usab ni Mr. Okit ang mga pamaagi ug proseso sa hustong pagamit sa pondo alang sa mga kalihukan, programa ug proyekto, subay sa mandu sa Commission on Audit (COA). Gipalawom usab ni Ms. Añover sa NYC ang kabahin Youth Online Registration Program (YORP), mga giya ug sumbanan sa pagmugna sa LYD Office, mga angayang ipahigayon nga trainings and workshop ug daghan pang uban. Gipasalig usab si Mayor Inocando nga ipadangat ngadto sa ubang mayores ang mga giatubang nga problema sa mga LYDO’s ilabi na ang paggahin ug pondo aron maabagan nila ang mga SK sa ilang tagsa-tagsa ka lungsod ug syudad.

Ang maong panagtigum gipasayon ni Ms. Arnie Lyn L. Mutia, ang gitudlo nga PYDO kauban si BLLYDO President Francis B. Awitin ug mga miyembro sa BLLYDO sa 20 ka lungsod ug 2 ka syudad sa Bukidnon.

###