Press Release No. 59 / March 18, 2022

ANDAM magpasiugda ang Provincial Government of Bukidnon, pinaagi sa Provincial Governor’s Office – Population & Development (POPDEV) Division sa pakigtimbayayong sa Provincial Health Office (PHO), Bukidnon Provincial Medical Center (BMPC) ug Population Commission Region 10 sa Adolescent Job Aid (AJA), Health Young Ones (HYO) ug Adolescent Education and Practical Training (ADEPT) sa nagkadaiyang local nga kagamhanan sa Bukidnon.

Tumong sa Kagamhanang Probinsyal sa pagpanguna ni Governor Jose Ma. R. Zubiri, Jr. nga mabansay ug makakat-on ang mga health providers sa hustong paagi o estratehiya sa pakighinabi o pakighimamat sa kabataan nga nakasinati ug pang-abuso, suicide and depression, biktima sa Sexually Transmitted Infection (STI), HIV/AIDS ug uban pang kasinatian nga modangop sa ilang buhatan.

Nasayran nga bag-o lang gipahigayon ang maong pagbansay didto sa LGU-Cabanglasan diin mipailalom ang 21 ka mga personahe gikan sa Philippine National Police (PNP)- Women and Children Protection Desk (WCPD), Municipal Social Welfare & Development Office (MSWDO), Department of Education (DepEd)-Bukidnon ug Sangguniang Kabataan (SK) sa lungsod sa Cabanglasan aron tukion ang mga mahinungdanong hisgutanan kalabot sa gender preferences, sexual and reproductive health, substance use, education, employment and protection sa tanang kabataan.

Ang pagpahigayon sa nasangpit training agi’g pagsunod sa mandu sa Adolescent Health and Development Program (AHDP) sa Department of Health (DOH) sa tumong nga mahatagan ug kalidad nga health care service ang tanang kabataan, makapahimulos sa adolescent-friendly nga pasilidad ug programa ingon man mahatagan ug pagtagad sa maamomahong health providers.

Gilauman nga dugang pa nga mga pagbansay ang mapahigayon ngadto sa ubang kalungsuran aron mas daghang health providers pa ang ilang mabansay ug matabangan nga makakat-on sa mga pamaagi ug estratehiya sa pagdumala sa kabataan.

###