Press Release No. 61 / March 23, 2022

PORMAL na nga gi-turnover sa Provincial Government of Bukidnon (PGB) ang walo ( 8 ) ka mga Provincial Funded Projects ngadto sa lokal nga kagamhanan sa Talakag, Bukidnon nga gipangulohan ni Municipal Mayor Vergito O. Factura, pinaagi sa gilunsad nga Turnover Ceremony niadtong Marso 21, 2022 sa Barangay 1, Talakag, Bukidnon.

Dul-an sa 90-milyones ka pesos ang kinatibuk-ang pundo nga gibubo sa probinsya alang niining walo ka mga dagkong proyekto nga gilangkuban sa Construction of Hall of Justice nga nagkantidad 20-milyones ka pesos; Construction of Local Road- ₱12 million; construction of Food Court- ₱13 million; Construction of Public Market (wet section)- sobra ₱13 million; Construction of Public Market (dry section)- sobra ₱8 million; Construction of Integrated Bus Terminal Building- ₱10 million; Construction of Potable Water Supply System – ₱8 million; ug Construction of Drainage System – ₱5 million.

“Grabe akong emosyon karon kay tungod niining dako kaayo nga proyekto nga gibubo ni Governor Zubiri sa Talakag. Mga kaigsuonan ko nagpasalamat kaayo ta niana… Kang Governor Zubiri, bisan layo ta, naa ta sa Northern part of Bukidnon, pero dinhi gibubo ang daghang mga proyekto” mao kini ang tipik sa pambungad nga mensahe ni Municipal Administrator Alberto S. Bigcas sa maong seremonya.

Gipaabot usab ni Provincial Vice Governor Rogelio N. Quiño, kinsa nagrepresenta kang Governor Jose Ma. R. Zubiri, Jr., ang iyang pagtimbaya ngadto sa lungsod sa Talakag niining dakong kalambuan sa ilang lungsod nga gipaningkamotan ni Governor Zubiri, inubanan sa pagsuporta sa mga miyembro sa Sangguniang Panlalawigan.

Mitambong sa maong seremonya si 1st District Board Member Mario Albarece, Jr., mga miyembro sa konseho sa Talakag, Bukidnon pinangulohan ni Municipal Vice Mayor Amado Z. Noble Jr. kinsa mapasalamaton ngadto sa pangagamhanang probinsyal tungod niining ubay-ubay nga mga mehoras nga natukod sa ilang lungsod, ug naglantaw nga hingpit na kining mahuman pinaagi na usab sa counterpart gikan sa panudlanan sa ilang lungsod.

###