Press Release No. 63 / March 24, 2022

MODUYOG ang Pangagamhanang Probinsyal sa Bukidnon, pinaagi sa Provincial Governor’s Office- Provincial Disability Affairs Division (PGO-PDAD) sa kasaulogan sa 18th Women with Disabilities Day, karong umaabot Marso 28, 2022.

Usa ka Tiktok Video Contest ang pagahimoon sa PGO-PDAD nga pagasalmutan sa usa lamang ka persons with disability (PWD) nga representante sa matag lungsod ug syudad, kung aha ang content sa tiktok video kinahanglang maghulagway ug haom sa tema karong tuiga nga “Kababaihang may Kapansanan sa New Normal: Kapantay, Kaisa at Kasama sa Inklusibong Kaunlaran”

Ang matag entry makita sa facebook account sa PDAO Bukidnon ug pagahukman kini ugmang adlawa, Marso 25, 2022 subay sa mga mosunod nga criteria: 25% sa number of reactions (wow and heart reactions); 25% creativity/uniqueness; ug 50% alang sa content o pagkahaom sa tema.

Ang makakuha sa 1st place makaangkon ug P2,000 samtang P1,700 ang 2nd place ug P1,500 ang 3rd place nga e-award karong Marso 28, 2022 diha sa Kaamulan Open Theater, Malaybalay City, Bukidnon.

Tumong sa maong pa-contest ang pag-awhag sa mga kababayen-an nga adunay mga kapansanan nga mamahimo nilang mapakita ang ilang talento sa pagsayaw, pagkanta o ba kaha pag-acting pinaagi sa tiktok ug mahimong sumbanan ug inspirasyon sa ubang PWDs sa lalawigan.

###