Press Release No. 64 / March 28, 2022

NAGPADAYON ang implementasyon sa 127 ka mga proyekto gikan sa kinatibuk-ang ihap nga 160 nga Local Government Support Fund-Support to Barangay Development Program (LGSF-SBDP) alang sa Calendar Year 2021, base sa gipadangat nga update ni DILG-Bukidnon provincial director Engr. Carmelo Enrique B. Libot, CESO V sa gipahigayon nga Provincial Peace and Order Council and Provincial Anti-Drug Abuse Council Joint 1st Regular Quarter Meeting, niadtong Marso 23, 2022 sa Kaamulan Open Theater, Malaybalay City, Bukidnon.

Sumala ni PD Libot nga sa maong gidaghanon sa on-going projects dinhi sa Bukidnon, as of March 23, 2022, 57 niini ang anaa na sa 0-30% nga physical accomplishment; 34 ka buok ang 31-60%; 25 ka buok ang 61-90%; ug 4 usab ang 91-100%, diin 7 niini nga mga proyekto ang nakumpleto na gikan sa LGU-Cabanglasan nga hingpit pagtunol sa Assistance to Farmers sa Barangay Canangaan ug Mandahican; Agriculture Livelihood and Technical / Vocational Training / Projects sa Kalugmanan, Manolo Fortich; New Construction sa Level II Potable Water Supply System sa Barangay Hagpa, Impasugong; ug ang Construction of Level III Potable Water System sa Puroks 6,7,9 sa Barangay Alanib, Lantapan.

ipakisayud usab ni PD Libot nga 33 pa ang anaa sa bidding sa procurement stage nga gilangkuban sa 27 ka mga proyekto sa Malaybalay City ug 6 usab ang gikan sa nagkalain-lain nga lungsod sa Bukidnon, ug gilauman nga sa mosunod nga mga bulan ipahigayon ang 3rd party monitoring alang sa mga napondohan nga mga proyekto dinhi sa Bukidnon. Mahinumduman nga sa CY 2021, 14 ka mga LGUs sa Bukidnon ang nahatagan sa pondo alang sa 71 ka mga barangay, diin tag-20 milyones ka pesos ang gi-alokar sa matag barangay.

Gitaho usab ni PD Libot nga alang sa CY 2022, ubos sa Local Budget Circular 144, adunay 16 ka mga LGUs sa Bukidnon ang maka-benepisyo sa susamang programa, kung aha kinatibuk-ang 81 ka mga barangay ang mabubu-an sa mga proyekto sama sa farm to market roads, school buildings, health stations, water sanitation systems, ug rural electrification, diin kinatibuk-ang ₱4 million ang itagana nga pondo sa matag barangay.

Kinasing-kasing nga gipasalamatan sa Kagamhanang Probinsyal sa Bukidnon ang nasudnong pangagamhanan sa programa niini nga LGSF-SBDP nga naka-angkla sa Executive Order No. 70 ni Presidente Rodrigo Duterte, pinaagi sa National Task Force to End Local Communist Armed Conflict (NTF-ELCAC) nga nagtinguhang maundang na ang armadong pakig-asdang pinaagi sa paghatag katumanan sa gipangandoy nga mga proyekto sa katawhan sa matag komunidad sa nasud.

###