Press Release No. 65 / March 28, 2022

“It’s so nice to finally see all of you face to face after two years. I really like seeing the dancers and I really missed the Kaamulan festivities kay sauna nga naa pa ang Kaamulan sa pre-pandemic, we were one of the first ones to be here to witness the extraordinary Street dancing and all the festivity. And I’d like to congratulate the Province of Bukidnon for bringing back Kaamulan…”

Kini ang giluwatan nga mensahe ni Regional Director Marie Elaine Unchuan sa Department of Tourism X sa pagdayeg sa Provincial Government of Bukidnon sa subling pagsaulog niini sa Kaamulan, atol sa gipahigayon nga Kaamulan 2022 Culture and Arts Exhibit niadtong Marso 25 ug molungtad sa Abril 3, 2022 sa Atrium, Robinsons Place, Valencia City.

Sumala ni Director Unchuan nga ang Kaamulan usa sa mga mamahimong instrumento sa pagpakusog ug subling pagbangon sa ekonomiya sa turismo ug patigayon human nga sobrang naapektuhan sa pandemya nga hatud sa COVID-19.

Gipadangat usab ni OIC provincial administrator Atty. Paul Vincent Villegas, kinsa nag-representa kang Governor Jose Ma. R. Zubiri, Jr. ang dakong pagpasalamat sa amahan sa lalawigan sa katawhan nga nagpabiling lig-on ug nakigtimbayayong gayud sa kagamhanang probinsyal hinungdan nga subling gibuksan ug pagasaulogan ang Kaamulan karong tuig human hinay-hinay na usab nga nagbalik sa normal ang mga kalihukan gumikan sa COVID-19. Gipasalamatan usab ang hiniusang paningkamot sa DTI-Bukidnon ug PGO-Provincial Tourism sa tabang sa DoT Region X nga naplastar ang Kaamulan 2022 Culture and Arts Exhibit nga mapakita gayud sa katawhan ang mga de-kalidad nga produkto sa Bukidnon.

Subay sa kasayuran gikan sa PGO-Provincial Tourism Division gilauman nga hangtud sa Abril 3, 2022 mohimo sa pag-presenta sa nagkadaiyang sayaw nga giumol ug gi-preserba sa nagkalain-laing tribu sa Bukidnon, ingon man sa mga kalihukan nga haom sa kasaulogan sa Kaamulan ang naka-schedule nga LGU of the Day.

Nasayran nga karong adlawa-Marso 28, 2022 naka-schedule ang LGU Quezon, samtang sa Marso 29 – naka-assign ang LGU Talakag; Marso 30 – LGU Libona; Marso 31 – LGU Don Carlos; Abril 1 – LGU Kibawe ug Pangantucan; Abril 2 – LGU San Fernando ug ang syudad sa Valencia usab sa Abril 3, 2022.

Naona na nga naghatag lingaw ang LGU Malaybalay City niadtong Marso 25, samtang ang LGU Impasugong usab ang nakatutok niadtong Marso 26 ug LGU Maramag, Cabanglasan ug Kadingilan niadtong Marso 27, 2022.

###