Press Release No. 67 / April 1, 2022

NAGPABILIN nga luwas ang probinsya sa Bukidnon gikan sa hulga sa African Swine Fever (ASF) ug Avian Influenza (AI) o Bird Flu, basi sa report ni Dr. Stephen M. Arcayera, ang OIC Provincial Veterinarian sa Provincial Veterinary Office, sa gipahigayon nga Provincial Disaster Risk Reduction & Management Council (PDRRMC) 1st Quarter Meeting alang sa tuig 2022, niadtong Marso 29, 2022 sa Kaamulan Open Theater, Kaamulan Park, Malaybalay City, Bukidnon.

Gibutyag ni Dr. Arcayera nga wala pay kaso ang probinsya sa nasangpit nga mga sakit sa kahayupan tungod sa striktong seguridad diha sa mga Provincial Veterinary Sanitary Checkpoints (PVSC), pinaagi sa pagsunod sa gipagawas nga mga Executive Orders (EO) ni Governor Jose Ma. R. Zubiri, Jr. nga nagmando sa temporaryong pagdili sa pagpasulod sa mga kahayopang baboy, domestic ug wild birds ingon man ang mga produkto ug by-products niini aron magpabiling luwas ang lalawigan.

Nahisgutan usab sa maong panagtapok ang nagkaubos nga kaso sa COVID-19 sa probinsya ug ang porsyento sa nagpabakuna, kung aha as of March 30, 2022 anaa na sa 69.94% ang fully vaccinated sa target population nga 1,234,035. Mihimo usab sa pagpresenta ang mga representate gikan sa Department of Education (DepED) Division of Bukidnon ug Malaybalay kabahin sa ilang pagpangandam sa umaabot nga limited face-to-face classes alang sa School Year 2021-2022, kung aha ang mga classrooms ug tulunghaan gibutangan na ug mga handwashing facilities and triage, COVID-19 signages ingon man ang pag-coordinate ngadto sa mga Barangay Health Workers, Nurses ug RHU alang sa kinatibuk-ang pag-atiman sa maayong panglawas sa kabataan.

Mihatag ug update si Dr. Miguel Antonio C. Prantilla sa nahitabong pag-endorso sa Bukidnon Provincial Medical Center (BPMC) sa Ligtas COVID-19 Center balik ngadto sa NMWRC niadtong Marso 15, 2022, sanglit wala na usab mga pasyente nga giatiman ang mga frontliners sa maong pasilidad.

Gi-aprobahan na usab sa miyembro sa konseho ang gipresenta nga Contingency Plan on Emerging and Re-emerging Infectious Diseases nga nagtakda sa mga plano sa probinsya sama sa plastar sa Sanitation & Hygiene Team, pagpakusog sa Mental Health Programs & Activities aron ma-andam ang probinsya ugaling aduna na usab pagkuyanap sa nagkalain-laing sakit sa umaabot nga panahon.

Ang maong panagtapok temporaryong gipangulohan ni DILG provincial director Engr. Carmelo Enrique B. Libot, CESO V, ang Vice-Chairman sa PDRRMC, nga gitambongan sa mga miyembro sa PDRRMC.

###