Press Release No. 71 / April 5, 2022

MOGRADWAR ang 26 ka mga mag-uuma gikan sa Sitio Kilabong, Brgy. Vista Villa, Sumilao, Bukidnon, ubos sa Farmers Field School (FFS) on Organic Lowland Rice Production ugmang adlawa, Abril 6, 2022 diha sa Municipal Hall, Sumilao, Bukidnon.

Ang maong programa gipundohan sa probinsya, pinaagi sa Provincial Organic Agriculture Program sa tinguha nga mahatagan ug igong kapasidad ang mga mag-uuma sa maayong gawi sa pagpanguma sa lowland rice pinaagi sa interactive ug aktwal o on-field nga pagkat-on. Gawas niana, matabangan ang mga mag-uuma nga madugangan ang ilang produksyon sa 15-30%, ingon man makatanyag ug luwas nga pagkaon sa kamerkaduhan sanglit organic man ang maong produkto.

Mahinumduman nga niadtong Marso 29, 2022 mi-gradwar usab ang 30 ka mag-uuma sa Paitan, Quezon, Bukidnon sa susamang programa human nila mahuman ang 16 ka semana nga pagtuon sa produksyon sa lowland rice gikan sa land preparation, pagtanom, pag-abuno hangtud sa pag-harvest.

Nasayran nga ang nasangpit nga mga site napunduhan ug budget sa probinsya sa milabay nga tuig 2021 pa, apan tungod sa sunod-sunod nga kalihukan sa buhatan sa Provincial Agriculture sama sa pag-distribute sa libreng binhi ug abono sa mais sa matag lokalidad, hinungdan nga karong tuig lamang napahigayon ang maong graduation ceremony gawas lamang sa Sinuda Kitaotao nga gipahigayon nidtong milabay nga tuig.

Sa impormasyon nga gikan sa Provincial Agriculture Office, mokabat ngadto sa 150,000.00 ka pesos ang ginabubo sa probinsya matag site o matag Farmer Field School alang sa training kit & material, binhi ug organic fertilizer, tools, pagkaon ug uban pa. Karong tuiga 2022, adunay upat (4) ka site ang gipundohan sa probinsya kung aha ipaga-finalized pa ang pag-identify niini.

###