Press Release No. 68 / April 5, 2022
GIHATAGAN sa dugang kasayuran sa Provincial Governor’s Office- Provincial Disability Affairs Division (PGO-PDAD), pinaagi sa pakigtimbayayong sa Bukidnon Provincial Police Office (BukPPO) ang mga kababayen-ang Persons with Disabilities (PWDs) kabahin sa Republic Act 8353 o Anti-Rape Law of 1997 atol sa kasaulogan sa 18th Women with Disabilities Day.
Tumong niini nga mahibalo ang mga kababayen-ang adunay kapansanan sa ilang katungod nga magreklamo ug magsumbong kung sila makasinate ug sexual nga pagpang-abuso, pinaagi sa pwersa o hulga gikan sa perpetrator o nagbuhat sa salaod. Gihingusgan nga magpadayon gihapon ang prosekusyon bisan pa ug bawion sa biktima ang kaso o gipasaylo na niya ang nakalapas sa balaod.
Mihimo usab sa pagpahibalo si PCMC Madeline G. Cenabre, usa sa dinapit nga tigpamaba gikan sa BukPPO, sa mga katungod sa kababaihan ubos sa Republic Act (RA) 11313 o “Safe Spaces Act” nga nagtutok sa gender-based sexual harassment o nagprotekta batok sa mga pagpang-abuso kanila ilabi na niadtong adunay kapansanan o persons with disabilities (PWDs). Gilakbitan usab niini ang proteksyon sa kababaihan batok sa cyberspace o pagpang-abuso gamit ang social media o computer ug ang mga nakatakda nga silot ngadto sa kinsa mang nagpanamastamas kanila.
Ang maong kasaulogan nagtangag sa temang “Kababaihang may Kapansanan: Kapantay, Kaisa, at Kasama sa Inklusibong Kaunlaran” nga gitambongan sa kababayen-ang PWDs gikan sa nagkalain-laing Local Government Units (LGUs) sa lalawigan, niadtong Marso 28, 2021 sa Kaamulan Open Theater, Kaamulan Park, Malaybalay City, Bukidnon.
###