Press Release No. 73 / April 7, 2022

GI-AWHAG sa 26th Sangguniang Panlalawigan (SP) ang Mines and Geoscience Bureau (MGB) sa subling pagsusi sa Paragraph 2, Section 5 sa Department of Environment and Natural Resources (DENR) Memorandum Order No. 2004-09 pinitsahan Agosto 31, 2004 nga himoong mandatory ang endorsement gikan sa Sangguniang Panlalawigan sa pag-asikaso sa mineral processing applications.

Hiniusang gipadayag sa mga miyembro sa SP nga pinasikad sa Akta Republika 7160 o ang Local Government Code of 1991, ingon man sa nakatakda nga gabayan sa Philippine Mining Act of 1995, gitahasan ang Provincial Government sa paghimo sa mahinungdanon nga papel sa pagdumala ug pag-regulate sa pagkuha sa balas, graba ug uban pang quarry resources, lakip ang loose and unconsolidated materials sa dili pa ihatag ang permits.

Apan gipakisayud sa SP nga ang sarang gakahitabo, sukwahi sa nakalatid nga mga gabayan nga diin ang mga aplikante modangop lang o mohimo sa ilang konsultasyon sa ubos nga sanggunian ug sa higayon nga makuha ang endorsement sa lower legislative bodies, ang pag-isyu sa endorsement gikan sa Sangguniang Panlalawigan mahimo nang ma-bypass, nga diin mas batid ang Kagamhanang Probinsyal sa aspeto sa teknikal nga kahibalo ug mga personhe aron makahimo sa mas komprehensibo nga mga pagtuon sa mga aplikasyon sa dili pa ihatag ang usa ka permit.

usa, alang sa interes ug kaayohan sa kadaghanan ug sa paningkamot nga mamintina o mapadayon ang balanse sa ekolohiya, ingon man sa paghatag kahigayonan sa tinguha sa mga aplikante alang sa eksplorasyon, pagpalambo, paggamit ug pagkonserba sa nasudnong kahinguhaan, ilabi na dinhi sa Bukidnon nga gigasahan sa mahinungdanon nga watersheds nga nagpadagayday sa tubig ngadto sa ubos nga mga silingang probinsya nga moagi niining mga quarry areas, gihingusgan sa SP nga angayan lamang nga himoong mandatory ang endorsement gikan sa Sangguniang Panlalawigan ngadto sa mga aplikasyon sa pag-proseso sa mineral resources.

###