Press Release No. 76 / April 8, 2022

MALAUMAN ang paghatag katagbawan sa hilig sa mga mountaineers sa pagsaka sa kabukiran inubanan sa boluntaryo nga pagprotekta sa kinaiyahan pinaagi sa Tree Planting Activity sa Mt. Kiamo, Kibalabag Trail sa ipahigayon nga Kaamulan Reunion Climb 2022 sa Barangay Kibalabag, Malaybalay City, karong Abril 23-24, 2022.

Sumala ni Ms. Blendale Lynn Acaba, ang registration in charge sa maong kalihukan, adunay 300 ka mga semilya sa pine tree ang gikatakda nga itisok sa nagkahiusang grupo sa mountaineers club sa Bukidnon ug sa mga silingang syudad ug probinsya didto sa maong area sa dili pa sila mohimo sa pagsaka.

Gibutyag ni Ms. Acaba, sunod nila nga ipahigayon ang tree growing activity sa umalabot bulan sa Hulyo o ba kaha sa Agosto aron masiguro nga ang mga semilya nga gitisok hingpit gayud nga motubo.

Alang sa mga interestado nga mo apil sa nasangpit nga kalihokan, mamahimong mokontak kang Ms. Blendale Lynn Acaba sa numero nga 09266745761 aron usab makisayud sa dugang kasayuran sa Kaamulan Reunion Climb 2022.

###