Press Release No. 78 / April 11, 2022

GITUTUKAN sa Provincial Government of Bukidnon, pinaagi sa PGO-Popoulation and Development Division (POPDEV) ang hustong pagplano sa pamilya, pinaagi pagpaila-ila sa modern family planning method ngadto sa kababayen-an o magtiayon nga anaa sa reproductive age.

Kini sa tinguha nga makab-ot ang zero unmet need ingon man aron malikayan ang mga unwanted pregnancies nga pwedeng mo-resulta sa unsafe abortion, maternal high-risk og labing kuyaw ang child and maternal mortality, rason nga gipahugtan ang pagsabwag sa kasayuran sa modern family planning method.

Alayon niini, nagpasiugda ang maong buhatan sa pakigtimbayayong sa Provincial Health Office (PHO) ug Population on Commission (POPCOM) Region 10 ug Family Planning Competency-Based Training (FPCBT), niadtong Marso 28-31, 2022 sa Hotel Valencia, Valencia City, Bukidnon, ngadto sa mga Population Program Officers sa probinsya aron mapadayag kanila ang kamahinungdanon sa Philippine Family Planning Program nga nagtutok sa maayong panglawas sa tanang Pilipino ilabi sa kababayen-an ug kabataan.

Gilauman nga hingpit nasabtan ang modern family planning method sa gilunsad nga upat ka adlaw nga pagbansay sa mga Population Program Officers diha sa ilang inadlaw-adlaw nga pakighimamat sa kababayen-an nga nagkinahanglan ug giya sa pagpili ug modern family planning method nga hiyang kanila.

###