Press Release No. 79 / April 11, 2022

NAGMALAMPUSON ang Motorcycle Endurance Riding (TABUK AdvenTOUR 600 Km challenge) diin gibana-bana nga anaa sa 405 ka mga riders ang misalmot niini nga kalihukan ubos sa pagpasiugda sa Bukidnon Sniper Club ug Endo Riders of Mindanao, niadtong Abril 9-10, 2022.

Gibutyag ni Mr. Mark Jay Abalde, usa sa mga organizers nga gawas sa nanganlang riders’ group, aduna usab miapil nga local riders ug mga bisita gikan sa Marawi, Pagadian, Ozamis, Davao, Iligan ug uban pang dapit ug probinsya sa Mindanao, diin halos gilibot niini ang probinsya sa Bukidnon.

Tumong sa maong kalihokan ang pagpakita o pagpasundayag sa maanindot nga mga talan-awon sa Bukidnon, ingon man ang pagpakita kung unsa ka-abunda ang kinaiyahan diha sa ilang pagsubay sa kadalanan sulod sa lalawigan.

Nasayran nga ang 600 Km. nga hagit nga paglibot sa Bukidnon nagsunod sa rota sugod sa syudad sa Malaybalay paingon sa munisipyo sa Cabanglasan via Aglayan, lahos sa munisipyo sa San Fernando gawas sa syudad sa Valencia pangadto sa GMCC Resort sa Barangay Sinuda, Kitaotao balik sa Kampo Juan, Maramag dayon sa intersection lahos sa landmark sa munisipyo sa Kibawe agi sa munisipyo sa Kadingilan, lahos sa munisipyo sa Kalilangan, agi sa munisipyo sa Talakag via Baungon-Libona nga dalan, gawas sa munisipyo sa Alae balik dayon sa syudad sa Malaybalay.

Gipasalamatan sa mga organizers nga nahimong posible ang maong kalihokan pinaagi sa suporta gikan sa nagkadaiyang sponsors, labi na ang Kagamhanang Probinsyal nga naghatag panugot nga malakip kini isip usa sa mga kalihukan sa Kaamulan 2022, ingon man sa City Government of Malaybalay City.

Sa tinguha nga mas magkahimamat ang mga misalmot nga riders, gipahigayon sa grupo ang Rider’s Night didto sa Kaamulan Open Theater, Malaybalay City, Bukidnon, diin gitunol ang ilang certificates of participation.

Gilauman nga sa sunod tuig nga Kaamulan celebration, subling mahitabo ang TABUK AdvenTOUR Season 2, pinaagi sa mapadayonong suporta sa Provincial Government of Bukidnon.

###