Press Release No. 83 / April 13, 2022

MIDUYOG ang Provincial Government of Bukidnon (PGB,) pinaagi sa Provincial Health Office (PHO) sa kasaulogan sa World Bipolar Day, nga gipasiugdahan sa International Bipolar Foundation, Asian Network of Bipolar Disorder ug International Society for Bipolar Disorder pinaagi sa usa ka online webinar, niadtong March 30, 2022.

Nagkalain-laing personahe nga misalmot sa online webinar gikan sa mga Local Government Units (LGUs), nurses, mga lisensyadong Psychometrician ug Psychology students. Sa tinguha nga mapasabot ug mahatagan sa katin-awan ang kung unsa ba gayud ang bipolar disorder ug unsa ang mga angayang buhaton aron malikayan, matambalan ug mapugngan kini.

Gipakisayod ni Ms. Cutie Canesares, Registered Psychologist ug dinapit nga tigpamaba, nga ang bipolar disorder usa ka sakit sa pangisip o mental illness diin kalit lamang ma-usab ang mood, pamatasan, energy, konsentrasyon ug abilidad sa mga nakasinati niini sa pagbuhat sa adlaw-adlaw nila nga mga buluhaton. Adunay duha ka klase sa pamatasan ang bipolar disorder nga mao ang “mania” ug “depression”. Ang “mania” behavior mao ang pagpakita ug sobra ka taas nga enerhiya, sobrang kumpyansa, kusog ug paspas nga pag-istorya, maglisod sa pagkatulog ug ang paghimu sa mga risgong butang. Samtang ang mga ilhanan sa “Depression” mao ang kanunay nga pamatyag nga kakapoy ug kaluya sa lawas ug panghuna-huna, kanunay mawad-an ug importansya sa iyang kaugalingon, pagkaon ug sobra kadaghan o pagkawala ug gana sa pagkaon, hilabing kasub-anan nga magresulta sa paghunos sa iyang kinabuhi.

Gipasabot ni Ms. Canesares nga dili kini angayang kahadlukan tungod kay mamahimo kining mapugngan pinaagi sa pag-inum sa tambal, pagpaubos sa mga therapy sama sa psychotherapy ug electroconvulsive therapy, ug ang labing importante ang family therapy ug support group nga andam mosabot, maminaw ug mounong kanila sa tanang higayon.

###