Press Release No. 84 / April 18, 2022

GIPAHIGAYON ang Ground Breaking Ceremony sa pagatukuron nga upat (4) ka facility buildings sa Bukidnon Environment and Natural Resources Office (BENRO), niadtong Abril 12, 2022 sa alas 6:30 sa buntag, sa Capitol Compound, Malaybalay City, Bukidnon.

Mapasalamaton si Ms. Cecille M. Egnar, ang Provincial Environment & Natural Resources (PENR) Officer nga nahatagan na gayud ug katumanan ang ilang gihandom nga mga facility buildings aron sa pagsagop o pag-implementa sa green building alang sa epektibo ug hustong paggamit sa water ug solar energy ug uban pang tinubdan sa enerhiya sa probinsya.

Ang maong mga mihoras magamit usab alang sa maayong pagdumala sa kinaiyahan ug natural nga kahinguhaan, ingon man magamit kini aron masuta ug ma-analisa kung ang atong katubigan hinlo ug luwas gamiton sa publiko.

Nasayran nga ang Pangagamhanang Probinsyal migahin ug pundo gikan sa General Funds aron matuman ang katukuran sa upat ka mihoras nga mao ang 3 Storey Eco-Sustainable Building- ₱30,000,000.00; Bukidnon Environment Training Center- ₱30,000,000.00; Environmental Laboratory Building- ₱2,000,000.00 ug Building Storage & Storage Facility- ₱2,000,000.00.

Mitambong niini si Atty. Paul Vincent G. Villegas, ang provincial legal officer ug OIC provincial administrator, kinsa nagrepresenta kang Governor Jose Ma. R. Zubiri, Jr., 2nd District Board Member Lorenzo Dinlayan, Jr., Provincial Treasurer Marilou Bueno ug Fr. Jonathan “Jojo” Tianero nga nanguna sa pag-bendisyon sa lugar nga pagatukuran sa nanganlang mga pasilidad.

###