Press Release No. 86 / April 19, 2022

PAGPANGAYO sa katahuran ug proteksyon sa espiritu sa tubig nga si Bulalakaw nga dili mahubsan ang mga tinubdan sa katubigan tungod kay usa usab kini sa tinubdan sa kinabuhi sa tawo.

Kini ang nag-unang tumong sa gipahigayon nga Panalawahig Ritual diha sa Provincial Kaamulan Tree Park nga gipangunahan sa mga datu ug bae gikan sa pitu ka tribu sa Bukidnon, alang sa nagpadayon nga Kaamulan 2022.

Ang “Panalawahig” o ritwal sa tubig usa sa naandan na nga kalihukan panahon sa Kaamulan, nga ginapahigayon subay sa pagdako sa bulan, tungod kay mao usab kini ang higayon isip pagbayad sa gihimong paghugaw-hugaw sa katawhan sa katubigan sa tibuok tuig.

Mahinumduman nga naona nga gipahigayon ang Pamukalag Ritual niadtong Marso 15, 2022 sa Capitol Compound, pipila ka adlaw sa wala pa pormal gibuksan ang Kaamulan 2022, ang panagtapok sa pito ka tribu sa Bukidnon nga gilangkuban sa tribung Talaandig, Higa-onon, Bukidnon, Umayamnon, Matigsalug, Manobo ug Tigwahanon.

###