Press Release No. 88 / April 20, 2022

PAGPAGAHUM ug pagdasig sa kabataan-onang Bukidnon ang nahimong sentro sa gilusad nga duha ka adlaw nga 1st Kaamulan Youth Summit nga gipahigayon sugod niadtong Abril 18-19, 2022 sa Kaamulan Open Theater Capitol Compound, Malaybalay City, Bukidnon.

“Ang Youth is importante gyud because you are the next generation. You are the next leader of the nation. Maybe ang uban sa inyo diri puhon mahimong sunod nga mayor, governor or other public officials. It is not by accident that you are here right now because ang Ginoo naay plano sa inyo by helping the community kung asa ka karun. In all these, always remember Him sa tanan ninyo nga buhaton…” kini ang tipik sa giluwatang mensahe ni Ptr. Bernie Abugan sa Jesus is Alive Community kinsa usa sa mga dinapit nga mamumulong nga mihatag sa mensahe alang sa Spiritual Refreshments.

Nahimong paagi usab ang maong kalihukan aron mahatagan ug higayon ang mga kabatan-onan nga makahimamat ug makalambigit sa ubang kabatan-onan diin gipasundayag usab dinhi ang ilang mga talento.

Pipila sa mga kalihukan ang gihan-ay sa maong panagtagbo sama sa bloodletting, tree planting, Kabataan trade fair, backyard gardening, zumba ug symposium nga naghatag kanila ug kahibalo sa mga katungdanan ug responsibilidad sa kabatan-onan isip lider ug ehemplo sa komunidad, ingon man paghisgot kalabot sa teenage pregnancy nga malikayan ug mapakgang kini nga problema.

Gipasayon sa PGO-Provincial Youth Development Division ang nasangpit nga kalihukan isip kabahin sa kalihukan sa Kaaamulan 2022 Activities nga gitambongan sa Bukidnon Youth, Local Youth Development Council Members Barangay/Municipal SK Chairmen ug mga Youth Development Officers sa Bukidnon.

###