Press Release No. 91 / April 25, 2022

GIPALAPDAN sa Provincial Government of Bukidnon ang usa ka kamanduan nga temporaryong nagdili sa pagsulod sa mga domestic ug wild birds, poultry products ug mga by-products niini sa probinsya sa Bukidnon, uban ang pagtakda sa dugang exemption agig pag-amenda sa Executive Order No. 5 ni Governor Jose Ma. R. Zubiri, Jr. pinitsahan Marso 10, 2022.

Nadugang sa exemption sa nasangpit nga kamanduan ang mosunod: tugutan lamang nga makasulod ang day old breeder chicks, day old pullets ug hatching eggs gikan sa Avian Influenza disease incidence-free province nga gi-sertipikahan sa hingtungdang provincial veterinarian/DA Regional Executive Director uban ang dokumento sa ELISA Test result sa sample nga gikolekta sa hatching eggs gikan sa tinubdang farm sulod sa pito (7) ka adlaw ug ELISA Test result usab ang pangitaon alang sa day old breeder chicks ug day old pullets sulod sa 21 ka adlaw nga makita sa gitakda sa condition D; samtang natakda usab sa condition E ang pagpasulod sa processed, fresh and frozen poultry meat, gawas ang gikan sa Luzon area ug Avian Influenza infected provinces, uban sa kinahanglanong dokumento sama sa VHC nga dugang nagpamatuod nga ang tinubdang farm luwas gikan sa maong sakit; ingon man ang ELISA test result gikan sa sample nga gikolekta sulod sa 21 ka adlaw, meat inspection certificate, BFAD certificate, ug License to operate.

Alang sa maong mga kondisyon nga gilatag, kinahanglan nga magkuha daan sa certificate of approval gikan sa Provincial Veterinarian of destination sa dili pa ibiyahe.

Mahinumduman nga pinaagi sa EO No. 5, gitahasan sa gobernador ang Provincial Veterinary Office nga gipangunahan ni acting provincial veterinarian Dr. Stephen M. Arcayera, pinaagi sa gimontar nga trese (13) ka mga Provincial Veterinary Sanitary Checkpoints nga susihon gayud ang tanang mosulod nga salakyan sa lalawigan gikan sa laing rehiyon sa nasud aron ipakisayud ang temporaryong pagdili sa pagpasulod sa mga poultry products.

Ang avian influenza—nailhan nga avian flu o bird flu – usa ka matang sa influenza o virus nga gikan sa langgam, kung aha ang maong klase adunay labing dako nga peligro mao ang gikunsidera kining highly pathogenic avian influenza.

###