Press Release No. 92 / April 25, 2022
“Ang purpose namo ani is ipakita namo nga ang goldfish breeder daghan diri sa Bukidnon, then ga-produce na ug mga quality nga goldfish nga pwede e-compete sa other provinces…” kini ang giluwatan nga mensahe ni Mr. Jessie Bert D. Sulatan, usa ka Bukidnon Goldfish Enthusiast ug event organizer sa gipahigayon nga 1st Kaamulan Goldfish Show, niadtong Abril 23-24, 2022 sa Barangay 6, Covered Court, Malaybalay City, Bukidnon.
Mapasalamaton si Sulatan sa suporta sa Provincial Government of Bukidnon (PGB) tungod sa paggahin niini ug pundo aron mahimong magmalampuson ang unang Goldfish Show sa probinsya ug maila kini sa ubang katawhan aron madasig sila nga mag-apil niini nga hilig. Sigun niya nga usa usab kini ka stress-reliever sa kadaghanan, ilabi niadtong panahon sa pandemya nga nakahatag kanila ug excitement ug kalipay.
Pipila sa mga tip o pamaagi nga gihatag alang niadtong gustong magbuhi ug magpadako sa goldfish nga pang-future show ang kalidad, kinahanglang magpili sila ug potential show grade gikan sa nailang goldfish keepers nga midaog na sa mga goldfish show, ang tubig nga gamiton kinahanglang moagi ug cycle gamit ang filter media sulod sa tulo (3) ka adlaw ayha butangan sa isda, bahogan sa dekalidad nga pellet fish food matag oras ug ilisan ang 20-30% nga tubig niini kaduha sa usa ka adlaw. Bukas ug andam sila nga motabang sa mga gustong magbuhi niini, diin pwede silang e-message sa Malaybalay Aqua Keepers ug Bukidnon Goldfish Club Facebook account alang sa dugang pang mga giya ug pamaagi.
Mokabat ngadto sa 97 ka mga entry sa klase-klaseng goldfish sama sa Oranda, Ryukin ug Ranchu ang gipasundayag, diin gisalmotan kini sa mga goldfish keepers gikan sa probinsya, ingon man gikan sa gawas sa Bukidnon sama sa Zamboanga, Gensan, Cagayan de Oro ug Davao. Gipanghinaot nila nga mapadayon kini nga kalihukan sa sunod pa nga Kaamulan aron mas daghan pa ang ilang ma-ingganyo ug ma-inspire. (Nakasukip niini nga pagmantala ang ang resulta sa nahitabo nga 1st Kaamulan Goldfish Show)
###