Press Release No. 93 / April 26, 2022

HINGPIT nang nahuptan sa Provincial Government of Bukidnon (PGB) ang pamatuod sa maayong liderato ug maalamon nga pagdumala sa Kagamhanang Probinsyal human gitunol ni Provincial Treasurer Marilou S. Bueno ang Certificate of Achievement sa PGB ngadto kang Provincial Governor Jose Ma. R. Zubiri, Jr. kaganihang sayo sa buntag-Abril 26, 2022 sa Provincial Governor’s Office.

Ang maong sertipiko sa kalampusan ilhanan sa pasidungog gikan sa Bureau of Local Government Finance (BLGF) nga naangkon sa PGB sa dihang migula kini nga ranked Top 2 sa tanang 81 ka mga probinsya sa nasud nga naghimo sa maayong performance alang 2019 Highest Nominal Locally Sourced Revenues (LSR) diin natala ang ₱844,284,710.06 LSR Collections. Kini pinasikad sa BLGF M.C. No. 006-2021 pinitsahan Pebrero 23, 2021.

Gipasabot ni Ms. Bueno nga gumikan sa maalamon ug maayo nga mandu sa Local Chief Executive sa Bukidnon, nahimong han-ay ug hapsay ang paghimo sa Provincial Treasurer’s Office sa tahas nga gilauman gikan kanila uban sa kalampusan usab sa tahas sa Provincial Assessor’s Office, partikular sa real property tax assessment.

Dungan nga gitunol ni Ms. Bueno ngadto kang Governor Zubiri ang 2020 Highest Nominal Locally Sourced Revenues, kung aha ranked No. 8 usab ang Bukidnon alang sa ₱802,864,719.00 LSR Collections.

Nakapatik sa sertipiko nga gipanghinaot sa BLGF nga ang maong pag-ila magpadayon sa kadasig sa Kagamhanang Probinsiyal, pinaagi sa Provincial Treasurer Office, sa pagpadayon sa mga paningkamot sa pagmugna ug kita ngadto sa mas maayong lokal nga pagdumala ug episyente nga serbisyo publiko.

Sa maong mga kalampusan sa Kagamhang Probinsyal sa Bukidnon, gikalipay kini ug dako sa lokal nga ehekutibo sa pagsunod sa tahas subay sa mga napalabang nga balaod ug sa mosunod nga mga sumbanan: revenue generation capacity, local collection growth, expenditure management, and timeliness in report submission.

###