Press Release No. 94 / April 26, 2022

MIGULA nga kampyon ang grupong Savage Glory gikan sa syudad sa Malaybalay sa gipahigayon nga 1st Kaamulan Intermunicipality Mobile Legend Tournament niadtong Abril 23, 2022 diha sa Kaamulan Open Theater, Malaybalay City, Bukidnon.

Ang grupong Efialtis Esports gikan gihapon sa syudad sa Malaybalay ang migulang 1st runner-up, samtang 2nd runner-up ang grupong Kiokong Uprising ug 3rd runner-up ang Op Epro nga parehong gikan sa lungsod sa Quezon, Bukidnon.

Mahinumduman nga gipahigayon nga elimination round niadtong Abril 1 hangtud Abril 18, 2022, diin walo ( 8 ) ka teams ang nagtigi sa maong championship round gikan sa kinatibuk-ang 64 teams gikan sa nagkalain-laing syudad ug lungsod sa Bukidnon.

Ang walo ka grupo gikalangkuban sa tag-duha (2) ka teams gikan sa syudad sa Malaybalay, lungsod sa San Fernando ug Quezon, samtang tag-usa ka team gikan sa lungsod sa Pangantucan ug Kibawe.

Tumong niini nga makamugna ug komunikasyon, koneksyon ug pagtinabangay tali sa ilang mga kagrupo ug mapalambo ang memorya, konsentrasyon ug abilidad sa pag-analisa sa mga stratehiya aron mahimong magmadaugon.Sa pakighinabi ngadto kang Mr. Socrates M. Alipayo, Jr., usa sa event organizer, mapasalamaton sila sa Pangagamhanang Probinsyal sa suporta aron mapakita ang abilidad sa kabatan-onan pinaagi niini nga online game. Gilauman usab nga sa sunod Kaamulan ila pa kining mapadayon aron mas mahatagan ug higayon ang kabatan-onan nga maila, dili lamang dinhi sa Bukidnon kung dili lakip na sa dagkong kompetisyon sa ubang dapit.

###