Press Release No. 96 / April 29, 2022
Gihingusgan sa Committee on Piniliyapan Hu Bukidnon ang pagpalapad ug pagpalambo sa tiunay nga simbolo sa mga tribu sa Bukidnon, pinaagi sa gipasiugdahan nga Piniliyapan Hu Bukidnon (Glimpses of Bukidnon) Documentation & Presentation.
Pinaagi sa pagtinabangay sa PGO-Provincial Tourism Division, PGO-Indigenous Affairs Division (IAD), National Commission on Indigenous People (NCIP), Kaamulan Committee ug Bukidnon State University (BukSU), nakahimo sila sa paglibot sa mga lungsod nga nahimutangan sa mayorya sa matag tribu aron saksihan, susihon ug e-dokumento ang tiunay, insakto o orihinal nga pagsayaw gamit ang saktong color sa costume, accessories, indayog ug lihok sa kamot ug tiil, hustong pagtugtog sa musika ug huni gamit ang tribal instruments.
Gikabalaka ni Dr. Lincoln Tan, ang Committee Chair sa Piniliyapan Hu Bukidnon nga kung dili ma-correct o ma-sakto ang mga sayop nga pasundayag sa mga Kaamulan Dancers panahon sa Street Dancing ug Ground Presentation sa mas sayo nga panahon, basin mao na kini ang maandan sa uban sa sunod pa nga mga kasaulogan sa Kaamulan.
Gipanghinaot ni Dr. Tan nga mapadayon pa kini nila nga kalihukan sa umaabot nga Kaamulan aron kanunay magiyahan ug mapahinuduman ang contenders sa matag lungsod ug syudad sa insaktong patakaran ug pamalaod subay sa approval sa mga elders. Gani, aron dili kini hingpit makalimtan, pagabuhatan ug instructional materials ang resulta sa gihimong research niini nga kalihukan, aron magamit ug mahimong basihan sa mosunod nga henerasyon.
###