Press Release No. 89 / April 21, 2022

MAPASIGARBUHON ang onse (11) ka mga paresan nga nakapahimulos sa gipahigayon nga libreng Tribal Wedding sa Provincial Government of Bukidnon (PGB), diha sa Centennial Stage, Kaamulan Park, Malaybalay City niadtong Abril 20, 2022. Kini usa sa mga nahimong highlights sa Kaamulan 2022 nga gisugdan niadtong Marso 23, 2022.

Sumala ni Provincial IPMR Datu Richard Dinlayan Macas nga dakong pribilihiyo o pabor kini sa mga kaigsoonang IPs nga matanyagan sa susamang libreng serbisyo gikan sa PGB nga kung adunay Kaamulan, sigurado gayud nga aduna usab libreng Tribal Wedding alang sa mga kaigsoonang lumad nga mahimong legal ang panag-uban tali sa ilang partners sulod sa pipila na usab ka tuig nga panag-ipon.

Gipasabot sa Provincial IPMR nga legal ang maong kasal sanglit giila man sa estado ang kulturanhong kasal sa mga kaigsoonang lumad, pinasikad sa pipila ka mga balaod nga gipatuman sa nasud, sama sa IPRA Law.

Gipanghinaut sa lider sa pito (7) ka tribu sa Bukidnon nga magmalambuon, magmabungahon ug magmalahutayon ang panag-uban isip managtiayon ang 11 ka mga paresan nga nahiusa pinaagi sa kulturanhong pagkasal nga gipasayon sa PGB, pinaagi sa opisina sa Provincial – Indigenous Peoples’ Mandatory Representative.

Ang maong kasal gidumala sa upat ka Solemnizing Officers nga sila si Bae Inatlawan Adelina D. Tarino sa tribong Bukidnon, Datu Makapukaw Adolino Saway sa Tribong Talaandig, Datu Jeodoro Sulda sa Tribong Manobo ug Datu Rhufo U. Inanod sa Tribong Higaonon, kinsa polos mga rehistrado sa Philippine Statistics Authority (PSA) isip solemnizing officers.

###